सकियो रमजान, अब इदको पालो!

कुराकानी । एक महिनासम्म चलेको रमजान मुबारक सकिएको छ। नेपाल सरकारले यस अवसरमा सार्वजनिक बिदा पनि दिएको छ । अब मुस्लिम समुदाय भोलिको इदउलफित्र मनाउने तयारीमा जुटेका छन्।

रमजान भनेको के हो?

रमजानभरि मुस्लिम समुदायका मानिसहरू सूर्योदयदेखि सूर्यास्तसम्म केही नखाई (रोजा बस्दै) दिन बिताउँछन्। रोजा बिहानको फजर नमाजअघि खानपान गरेर सुरु हुन्छ र बेलुकाको मगरिब नमाजपछि मात्र खोलिन्छ। यो समय हरेक दिन सूर्योदय र सूर्यास्तको आधारमा फरक हुन सक्छ।

रमजान इस्लामिक पात्रो (हिजरी संवत्) अनुसार नवौँ महिना हो। यसै महिनामा इस्लाम धर्मको पवित्र ग्रन्थ कुरान अवतरण भएको विश्वास गरिन्छ। रमजान आत्मसंयम, कृतज्ञता, दान, र आत्मशुद्धिको महिना हो।

रोजा बस्नु मात्रै हैन, दान गर्नु पनि मत्वपूर्ण

रमजानमा दान (जकात) दिन महत्त्वपूर्ण मानिन्छ। गरिब तथा असहायलाई सहयोग गर्नु यो महिनाको ठुलो विशेषता हो। रमजानको अन्त्यतिर मुस्लिम समुदायले आकाशतिर चन्द्रमा खोज्छन् , किनकि चन्द्रमा देखिएपछि इद आएको संकेत मानिन्छ।

रमजानले नराम्रो बानीहरू त्याग्न पनि मद्दत गर्छ । चुरोट, गुट्खा, मदिरा जस्ता कुलतबाट टाढा रहन एक महिना रोजा बस्दा सकारात्मक प्रभाव देखिन्छ। तर, बच्चा, बिरामी, गर्भवती महिला र अशक्त व्यक्तिहरूलाई रोजा अनिवार्य छैन।

अब इद आउँदैछ!

रमजानको २९ वा ३० दिन पूरा भएपछि इदउलफित्र मनाइन्छ। यो दिन मुस्लिम समुदाय मस्जिद वा इदगाह मा जम्मा भएर विशेष इद नमाज पढ्छन्। नमाज सकिएपछि एकअर्कालाई अङ्कमाल गरेर शुभकामना दिन्छन् र परिवारसँग बसेर मिठा परिकार खान्छन्।

इदअघि फित्रा दिनुपर्छ, जुन गरिब तथा मदरसा (इस्लामिक विद्यालय) का विद्यार्थीहरूलाई सहयोग गर्न खर्च गरिन्छ।

ताराबी नमाज र हाफिजको सम्मान

रमजानमा दैनिक पाँच वटै नमाजसँगै ताराबी नमाज पनि विशेष रूपमा पढिन्छ। यो रातभर चल्ने नमाज हो, जसमा पवित्र कुरान पाठ गरिन्छ। जसले कुरान कण्ठस्थ गरेको (हाफिज) हुन्छ, उसैले यो नमाज पढाउँछ। कुरान पाठ सकिएको दिन हाफिजलाई उपहार दिने चलन छ।