बागमती प्रदेश सरकारमा सहभागी नेकपा (एमाले) का ६ जना मन्त्रीले सामूहिक रूपमा राजीनामा दिएका छन्। केन्द्रमा नेपाली कांग्रेस र नेकपा (एमाले) बीच विकसित नयाँ राजनीतिक समीकरण र प्रदेश सरकारको पुनर्संरचनाको तयारीसँगै उनीहरूले पदबाट बाहिरिने निर्णय गरेका हुन्।

राजीनामा दिने मन्त्रीहरूमा उद्योग, वाणिज्य, भूमि तथा प्रशासन मन्त्री बिन्दु श्रेष्ठ, भौतिक पूर्वाधार विकास मन्त्री दिनेशचन्द्र देवकोटा, स्वास्थ्य मन्त्री किरण थापा, वन तथा वातावरण मन्त्री भरतबहादुर केसी, कृषि तथा पशुपन्छी विकास मन्त्री मधुसूदन पौडेल तथा श्रम, रोजगार तथा यातायात मन्त्री जयराम थापा रहेका छन्।

यसअघि एमाले संसदीय दलका नेता जगन्नाथ थपलियाले प्रदेश सरकारमा रहेका आफ्ना मन्त्रीहरूलाई राजीनामा दिन निर्देशन दिएका थिए। केन्द्रको राजनीतिक समीकरणअनुसार प्रदेश सरकारको संरचनामा पनि परिवर्तन आवश्यक भएकाले यस्तो निर्णय गरिएको एमाले स्रोतले जनाएको छ।

मुख्यमन्त्री इन्द्रबहादुर बानियाँ नेतृत्वको सरकारमा एमालेको बहिर्गमनसँगै बागमती प्रदेशको सत्ता समीकरण फेरिने सम्भावना बढेको छ। प्रदेश मन्त्रिपरिषद् पुनर्गठन, मन्त्रालयको जिम्मेवारी बाँडफाँट तथा नयाँ साझेदारको विषयमा राजनीतिक दलहरूबीच छलफल जारी रहेको बताइएको छ।

एमालेका मन्त्रीहरूको राजीनामापछि बागमती प्रदेशको आगामी राजनीतिक दिशा र सरकारको स्थायित्वलाई लिएर चासो बढेको छ। केन्द्रमा हुने निर्णयले प्रदेश सरकारको स्वरूपसमेत तय गर्ने भएकाले अबको राजनीतिक गतिविधि निर्णायक हुने विश्लेषण गरिएको छ।