फिल्म समीक्षा

अनमोलको अभिनय र प्रिन्सीको डेब्युले जोगाउन सकेन ‘बाटुलो जुन’

अनमोलको अभिनय र प्रिन्सीको डेब्युले जोगाउन सकेन ‘बाटुलो जुन’

फरक समय र परिवेशलाई आधार बनाएर कथा प्रस्तुत गर्न खोजिए पनि त्यसलाई पर्दामा स्पष्ट रूपमा देखाउन सकिएको छैन।

  • पुष्पा थपलिया

  • बिहिबार, मंसिर ४, २०८३

  • 2
    SHARES

कुराकानी। अनमोल केसी र प्रिन्सी खतिवडा अभिनित फिल्म ‘बाटुलो जुन’मा शिक्षित युवक अभिमान जंग र अशिक्षित ग्रामीण युवती जुनेश्वरीबीचको प्रेम कथालाई प्रस्तुत गरिएको छ। प्रेम कथासँगै फिल्मले शिक्षाको अभाव, ग्रामीण चेतना र अन्धविश्वासजस्ता सामाजिक विषय पनि उठाएको छ।

फिल्मको पहिलो बलियो पक्ष अनमोल केसी र प्रिन्सी खतिवडाको अभिनय हो। अनमोलले आँखाको हाउभाउमार्फत अभिनय गरेका छन्। पहिलोपटक निर्वाह गरेको ग्रामीण पात्रलाई उनले न्याय दिएका छन्। त्यस्तै, प्रिन्सीको डेब्यु अभिनय पनि धेरैजसो दृश्यमा प्रभावकारी छ। दुवै कलाकारबीचको केमेस्ट्री र प्राकृतिक अभिनयले दर्शकलाई आकर्षित गर्छ।

फिल्मको दोस्रो सकारात्मक पक्ष सिनेमाटोग्राफी र लाइटिङ हो। विशेषगरी भावनात्मक दृश्यमा आँखामा प्रयोग गरिएको प्रकाश, अँध्यारा दृश्यको प्रस्तुतिकरण, रङ संयोजन तथा पोशाकले फिल्मलाई दृश्यात्मक रूपमा आकर्षक बनाएको छ।

तेस्रो सकारात्मक पक्ष प्रेम कथासँगै सामाजिक मुद्दाको उठान हो। शिक्षित युवक र अशिक्षित युवतीको प्रेम कथामार्फत शिक्षाको अभाव, ग्रामीण समाजको चेतनास्तर र अन्धविश्वासजस्ता विषयलाई प्रस्तुत गरिएको छ।

तर फिल्ममा तीन मुख्य कमजोरी छन्।

पहिलो, फिल्मको समय र परिवेश स्पष्ट छैन। कथा कुन समयको हो भन्ने कुरा नखुलाइँदा दर्शकलाई फिल्मले निर्माण गरेको संसार विश्वास गर्न कठिन हुन्छ। फरक समय र परिवेशलाई आधार बनाएर कथा प्रस्तुत गर्न खोजिए पनि त्यसलाई पर्दामा स्पष्ट रूपमा देखाउन सकिएको छैन।

दोस्रो, पटकथामा बलियो द्वन्द्वको अभाव छ। कथामा आउने समस्याहरू सहजै समाधान हुन्छन्। चोर पक्रिने र पढ्नका लागि मान्छे ल्याउनेजस्ता द्वन्द्वले पनि दर्शकलाई लामो समय बाँध्न सक्दैनन्। मुख्य द्वन्द्व स्थापित हुन नसक्दा गलत बुझाइलाई नै द्वन्द्वका रूपमा प्रस्तुत गरिएको छ। फिल्मको अन्त्यसम्म दर्शकलाई उत्सुक बनाइराख्ने आधार कमजोर देखिन्छ।

तेस्रो, जुनेश्वरीको पहिरन र बिम्बको प्रयोग प्रभावकारी छैन। ग्रामीण तथा अशिक्षित युवतीको भूमिकामा रहेकी जुनेश्वरीको पहिरन अत्यधिक ग्ल्यामरयुक्त देखिँदा पात्रको सामाजिक परिवेशसँग मेल खाँदैन। गाउँका अन्य महिला पात्रभन्दा उनको पहिरन फरक देखिनुले पात्रलाई अवास्तविक बनाएको छ।

त्यस्तै, जुनेश्वरी र बुख्याचाबीचको सम्बन्धलाई पनि पर्याप्त रूपमा स्थापित गर्न सकिएको छैन। जुनेश्वरीले बुख्याचालाई अभिमानका रूपमा लिएको देखाइए पनि त्यसलाई पुष्टि गर्ने पर्याप्त दृश्य छैनन्। अन्य बिम्बहरूको प्रयोग पनि प्रभावकारी हुन सकेको छैन।

समग्रमा ‘बाटुलो जुन’मा अनमोल केसीको आँखाको अभिनय, प्रिन्सी खतिवडाको डेब्यु र राम्रो लाइटिङ प्रशंसनीय छन्। तर कमजोर पटकथा, अस्पष्ट समय र परिवेश तथा पात्र चित्रणमा देखिएको अस्वाभाविकताले फिल्मलाई प्रभावकारी बन्न दिएको छैन। फिल्म समग्रमा औसत बनेको छ।


सम्बन्धित समाचार
       © 2022 - 2026 to कुराकानी | Kurakani ,  All Rights Reserved.  Crafted by Bitcraft Technology