कुराकानी। काठमाडौँ महानगरपालिकाका नवनियुक्त प्रमुख प्रशासकीय अधिकृत मुक्तिराम अर्यालले पदबहाली गरेका छन् । बुधबार पदबहाली गरेका अर्याललाई महानगरपालिकाकी कार्यवाहक प्रमुख सुनिता डंगोलले स्वागत गर्दै महानगरका नीति, योजना तथा कार्यक्रम प्रभावकारी रूपमा कार्यान्वयन गर्न कुशल नेतृत्वको अपेक्षा गरेकी छन् ।

कार्यवाहक प्रमुख डंगोलले सेवा प्रवाह सुधार, कर्मचारी प्रशासनलाई अनुशासित र मर्यादित बनाउन तथा कर्मचारी र जनप्रतिनिधिबीच समन्वय कायम गर्न प्रमुख प्रशासकीय अधिकृतको भूमिका महत्वपूर्ण हुने बताइन् ।

उनले बहुस्तरीय पार्किङस्थल निर्माण, भृकुटीमण्डपमा मेगाहल निर्माण, नेपाल सरकारसँग भएका सम्झौताअनुसार महानगरले प्राप्त गर्नुपर्ने सम्पत्ति प्राप्त गर्ने लगायत ठूला आयोजना अघि बढाउन संघ सरकारसँग प्रभावकारी समन्वय आवश्यक रहेको बताइन् । सुस्त गतिमा रहेका योजनालाई तीव्रता दिन पनि उनले अर्याललाई आग्रह गरिन् ।

‘सेवा प्रवाह, अनुशासित र मर्यादित कर्मचारी प्रशासनका लागि समन्वयकारी नेतृत्व आवश्यक छ,’ डंगोलले भनिन्, ‘कर्मचारी र जनप्रतिनिधिबीच समन्वय र सहजीकरण गर्दै केही सुस्त रहेका योजनालाई तीव्र रूपमा अघि बढाउनुपर्छ ।’

उनले अर्यालको कार्यकाल महानगरवासीका लागि फलदायी र महानगरपालिकाको सार्वजनिक छवि उच्च बनाउन स्मरणीय हुने विश्वास व्यक्त गरिन् ।

वि.सं. २०६६ मा शाखा अधिकृतबाट निजामती सेवामा प्रवेश गरेका अर्याल २०७३ मा उपसचिव र २०८० मा सहसचिव भएका हुन् । उनी पछिल्लो एक वर्षदेखि पोखरा महानगरपालिकाको प्रमुख प्रशासकीय अधिकृतका रूपमा कार्यरत थिए । यसअघि उनले लुम्बिनी प्रदेशको रेसुङ्गा नगरपालिकामा प्रमुख प्रशासकीय अधिकृतका रूपमा काम गरेका थिए ।

साउन २० गते बसेको मन्त्रिपरिषद्को निर्णयअनुसार अर्याल पोखरा महानगरपालिकाबाट काठमाडौँ महानगरपालिकामा सरुवा भएका हुन् । यसअघि काठमाडौँ महानगरपालिकाको प्रमुख प्रशासकीय अधिकृत रहेका सरोज गुरागाईं उमेर हदका कारण साउन २० गते अनिवार्य अवकाशमा गएका थिए ।

पदबहालीपछि आयोजित परिचयात्मक कार्यक्रममा अर्यालले काठमाडौँ महानगरपालिकालाई स्थानीय सुशासन, स्वशासन, विकास र व्यवस्थापनको सिकाइ केन्द्रका रूपमा विकास गर्ने प्रतिबद्धता जनाए ।

उनले कर्मचारी प्रशासनमा तटस्थता र आचार–आचरणलाई प्राथमिकतामा राख्ने बताए । साथै, सेवाग्राहीको आवश्यकता र छनोटका आधारमा सामूहिक निर्णयमार्फत कार्यक्रम कार्यान्वयनमा लैजानुपर्नेमा जोड दिए ।

‘काठमाडौँबाट अहिले पनि धेरै पालिकाले धेरै कुरा सिकिरहेका छन् । महानगरपालिकाका अन्य कामलाई पनि सिकाइयोग्य बनाउनुपर्छ,’ अर्यालले भने, ‘यसका लागि कर्मचारी तटस्थता हाम्रो मुख्य आचरण हो । कर्मचारीका आचार र आचरणमा कतै पनि कमजोरी हुन दिनुहुँदैन ।’