कुराकानी
कुराकानी। संघीय संसद्का दुवै सदन (प्रतिनिधिसभा र राष्ट्रिय सभा) को आजको बैठकमा आगामी आर्थिक वर्षको बजेटमाथि छलफल सुरु भएको छ। बैठकमा विभिन्न विधेयकहरू अघि बढाउने कार्यसूचीका साथै समितिगत प्रस्तावहरू समेत प्रस्तुत गरिएका छन्।
प्रतिनिधिसभा बैठकमा अर्थमन्त्रीले आगामी आर्थिक वर्षको राजस्व तथा व्यय अनुमानमाथि सामान्य छलफल प्रारम्भ गरियोस् भन्ने प्रस्ताव पेस गरेका छन्। यसका साथै बजेटसँग सम्बन्धित अन्य महत्त्वपूर्ण विधेयकहरू—विनियोजन विधेयक, सार्वजनिक ऋण व्यवस्थापन विधेयक र नेपाल राष्ट्र बैंक (संशोधन) विधेयक—माथि पनि छलफल अघि बढाइएको छ।
त्यस्तै, संस्कृति, पर्यटन तथा नागरिक उड्डयन मन्त्रालयले पर्यटनसम्बन्धी विधेयकलाई दफावार छलफलका लागि सम्बन्धित समितिमा पठाउने प्रस्ताव प्रस्तुत गरेको छ। बैठकको कार्यसूचीमा अन्य मन्त्रालयसँग सम्बन्धित विभिन्न अन्तर्राष्ट्रिय सन्धि तथा कानुनी प्रस्तावहरू समेत समेटिएका छन्।
बजेट र विधेयकहरूमाथि छलफल अघि बढे पनि संसद् बैठक सहज रूपमा सञ्चालन हुन सकेको छैन। प्रधानमन्त्रीसँग प्रत्यक्ष प्रश्नोत्तर सत्र सुनिश्चित गरिनुपर्ने माग राख्दै केही विपक्षी दलहरूले निरन्तर अवरोध पुर्याइरहेका छन्। सत्तापक्ष र विपक्षीबीच सहमति जुट्न नसक्दा बैठकको कार्यबाही बारम्बार प्रभावित हुँदै आएको छ।
संसद् सचिवालयका अनुसार आजका बैठकहरू क्रमशः बिहान ११ बजे र दिउँसो १ बजेका लागि तय गरिएका थिए।
