कुराकानी। टिकटकमार्फत चर्चामा आएकी तुलसा अधिकारीलाई पुर्पक्षका लागि थुनामा राख्ने जिल्ला अदालत ललितपुरको आदेश उच्च अदालत पाटनले सदर गरेको छ।

उच्च अदालतले अधिकारीलाई थुनामै राख्नुपर्ने आधारका रूपमा जाहेरवाला कुमार चामोरियाको जाहेरी, विभिन्न व्यक्तिले प्रहरीसमक्ष दिएको बयान तथा प्रहरी प्रतिवेदनलाई उल्लेख गरेको छ।

त्यस्तै, अदालतमा दिएको बयानमा जाहेरवालासँग सम्बन्ध रहेको स्वीकार गरेको र आफ्नो कम्पनी ‘तुलसा कलेक्सन प्रालि’को आय–व्यय विवरणमा वास्तविक कारोबारभन्दा कम देखिएको विषयमा आफ्नो कमजोरी रहेको बताएको तथ्यलाई पनि आदेशमा आधार बनाइएको छ।

अधिकारीविरुद्ध आपराधिक लाभ, संगठित अपराध तथा सम्पत्ति शुद्धीकरणसम्बन्धी कसुरमा २१ करोड १२ लाख २० हजार ४०६ रुपैयाँ १६ पैसा बिगो मागदाबी गरिएको छ।

जिल्ला अदालतको आदेशविरुद्ध थुनामुक्तिको माग गर्दै उच्च अदालत पुगेकी अधिकारीको निवेदन खारेज भएसँगै उनी मुद्दाको अन्तिम फैसला नआएसम्म थुनामै रहनेछिन्।

यद्यपि, उनीमाथिका आरोप अदालतबाट अन्तिम रूपमा प्रमाणित भइसकेका छैनन्।