कुराकानी। तिब्बती शरणार्थीका नाममा गैरकानुनी रूपमा ट्राभल डकुमेन्ट जारी गरेको आरोपमा परराष्ट्र मन्त्रालयका सहसचिव पुष्पराज भट्टराई पक्राउ परेका छन्।

नेपाल प्रहरीको केन्द्रीय अनुसन्धान ब्युरो (सीआईबी) को अनुसन्धानका आधारमा जिल्ला सरकारी वकिल कार्यालय काठमाडौंले पासपोर्ट कसुरसम्बन्धी मुद्दा दायर गरेपछि भट्टराई पक्राउ परेका हुन्। उनी हाल परराष्ट्र मन्त्रालयको श्रम, आप्रवासन तथा गैरआवासीय नेपाली समन्वय महाशाखाका प्रमुखका रूपमा कार्यरत छन्।

अनुसन्धानअनुसार भट्टराईले २००९ मा भारतीय शरणार्थी शिविरमा रहेका पाँच तिब्बती शरणार्थीका लागि नक्कली कागजातका आधारमा ट्राभल डकुमेन्ट जारी गर्न भूमिका खेलेको आरोप छ। उक्त डकुमेन्ट परिवार पुनर्मिलनको बहानामा जारी गरिएको अभियोगपत्रमा उल्लेख छ।

प्रहरीले भट्टराईसहित अन्य संलग्न व्यक्तिविरुद्ध पासपोर्ट ऐनअन्तर्गत कारबाहीको माग गरेको छ। यद्यपि भट्टराईले भने आफूले कुनै गैरकानुनी काम नगरेको र आफ्नै हस्ताक्षर दुरुपयोग गरिएको हुन सक्ने दाबी गरेका छन्।