कुराकानी। फिफा विश्वकप २०२६ अन्तर्गत आज हुने डिफेन्डिङ च्याम्पियन अर्जेन्टिना र केप भर्डेबीचको राउन्ड अफ ३२ को खेल खराब मौसमका कारण प्रभावित हुन सक्ने देखिएको छ । फ्लोरिडाको मियामीस्थित हार्ड रक स्टेडियममा तय गरिएको खेलको समयमा आँधी–बेहरी र चट्याङसहित भारी वर्षाको पूर्वानुमान गरिएपछि खेल ढिलाइ वा स्थगनसमेत हुन सक्ने आशंका गरिएको हो ।

स्थानीय मौसम पूर्वानुमानअनुसार खेल सुरु हुने (किकअफ) समय आसपास नै मौसम अत्यधिक अस्थिर रहने सम्भावना छ । यसले मैदानको अवस्था र दर्शकहरूको सुरक्षामा गम्भीर असर पार्न सक्ने भन्दै प्रतियोगिताका आयोजकहरूले मौसम परिस्थितिलाई नजिकबाट निगरानी गरिरहेका छन् ।

विश्वकपको साविक विजेता अर्जेन्टिना आफ्नो लगातारको उत्कृष्ट प्रदर्शनलाई निरन्तरता दिँदै अन्तिम १६ मा स्थान सुरक्षित गर्ने लक्ष्यमा छ । अर्कोतर्फ, पहिलो पटक विश्वकपको नकआउट चरणमा पुगेर इतिहास रचेको केप भर्डे आफ्नो ऐतिहासिक यात्रालाई अझ अगाडि बढाउने तयारीमा छ ।

यसअघि पनि जारी प्रतियोगिताका केही खेलहरू मौसमकै कारण ढिलाइ भएकाले आजको खेललाई लिएर दुवै टोली र आयोजकहरू उच्च सतर्क बनेका छन् ।

खेल नेपाली समयअनुसार राति हुने तय भए पनि यसको निरन्तरता वा स्थगनबारे अन्तिम निर्णय मैदानको तत्कालको मौसमी अवस्थालाई हेरेर मात्र गरिने आयोजकहरूले जनाएका छन् ।