कुराकानी। नेकपा एमालेका नेता सूर्य थापाले इनम सापकोटालाई प्रधानमन्त्री बालेन्द्र शाह (बालेन) को निर्वाचन क्षेत्रमा सर्वेक्षण गर्ने जिम्मेवारी दिइएको दाबी गरेका छन्।

न्यायालयका उच्च पदाधिकारी, सुरक्षा निकायका अधिकारी तथा राजनीतिक व्यक्तिहरूसँगको सम्पर्कका कारण विवादमा तानिएका सापकोटाबारे नयाँ राजनीतिक दाबी सार्वजनिक भएको हो।

सापकोटा पछिल्लो समय न्यायालयमा बिचौलियाको भूमिका खेलेको आरोप र उच्च तहका व्यक्तिहरूसँगको सम्पर्कका कारण अनुसन्धानको घेरामा छन्। उनको मोबाइल फोनको डिजिटल फरेन्सिक परीक्षणका क्रममा विभिन्न उच्च पदस्थ व्यक्ति तथा न्यायाधीशहरूसँग भएका संवाद र आर्थिक कारोबारसम्बन्धी विवरण फेला परेको समाचारहरू सार्वजनिक भएका छन्।

यसअघि सर्वोच्च अदालतका न्यायाधीश हरि फुयालसँग सापकोटाले गरेको संवादसमेत सार्वजनिक भएको थियो। उक्त संवादमा प्रधानमन्त्री बालेन शाहको नाम प्रयोग गरेर विचाराधीन मुद्दामा प्रभाव पार्न खोजिएको विवरण बाहिरिएको थियो।

त्यस्तै, प्रधानन्यायाधीश डा. मनोज शर्मासहित केही उच्च पदस्थ व्यक्तिको नाम जोडिएका आर्थिक कारोबारसम्बन्धी विवरणसमेत सार्वजनिक भएका छन्। यद्यपि, नाम जोडिनुले मात्रै सम्बन्धित व्यक्तिहरूको संलग्नता पुष्टि गर्दैन।

सापकोटाको गतिविधिबारे प्रहरीले विशेष अनुसन्धान टोलीसमेत गठन गरेको छ।